Hüquq elmləri sahəsində elmi tədqiqatların səmərəli üsullarından biri xarici
dövlətlərin qanunvericiliyinin müqayisəli-hüquqi təhlilidir. Bu metoddan istifadə həm milli
qanunvericiliyin xüsusiyyətlərini daha yaxşı
başa düşməyə imkan verir, həm də Azərbaycan
cinayət hüququnun təkmilləşdirilməsi yollarının
axtarılmasına kömək edir.
A.İ.Quliyev haqlı olaraq qeyd edir ki, müqayisəli-hüquqi yanaşma özündə elə üsul və vasitələri ehtiva edir ki, onların köməyi ilə müasir
təzahürlərin ümumi xassələrinin və spesifik cəhətlərinin müəyyənləşdirilməsi üçün müxtəlif
ölkələrin hüquq sistemləri tutuşdurulur. Belə
müqayisə hazırda müxtəlif hüquq ailələrində və
ya ayrı-ayrı hüquq sistemlərində mövcud olan
qanunların və qanunvericiliyin üst-üstə düşən
xarakteristikalarının tədqiqini nəzərdə tutur
(sinxron müqayisə).