Fiziki və hüquqi şəxslərin pozulmuş və
ya mübahisəli hüquqlarının və qanunla
qorunan mənafelərinin müdafiəsi təkcə maraqlı
şəxsin pozulmuş və ya mübahisəli hüququnun və
ya qanunla qorunan mənafeyinin müdafiəsi üçün
məhkəməyə müraciət etmək imkanını nəzərdə
tutmur; həm də qanuni qüvvəyə minmiş məhkəmə
qərarının icrasın əhatə edir. Əks halda iddiaçının
öz hüquqlarını qorumaq üçün müraciət etdiyi
mülki işlər üzrə ədalət mühakiməsinin mahiyyəti
təhrif edilir, hüquq, azadlıq və qanunla qorunan
mənafelərin müdafiəsi məqsədinə nail olunmur.
Ədalətin və tam məhkəmə müdafiəsinin təmin
edilməməsi, məhkəmə hakimiyyətinin nüfuzuna
mənfi təsir göstərir və hüquqi vasitələrin effektivliyinə şübhələr yaradır. Müvəqqəti təminat
tədbiri institutu gələcək məhkəmə qərarının icrasını təmin etmək məqsədi daşıyır.