Azərbaycan Respublikası Cinayət Məcəlləsinin 19-cu maddəsinə görə, cinayətin
subyekti qanunvericiliklə müəyyən olunmuş yaş
həddinə çatmış anlaqlı fiziki şəxsdir [1]. Yəni
şəxsin cinayət məsuliyyətinə cəlb edilməsinin
mümkünlüyü üçün iki mühüm şərt vardır: bunlardan biri cinayət törətmiş şəxsin qanunvericilikdə
müəyyən olunmuş yaş həddinə çatması, digəri
isə onun anlaqlı fiziki şəxs olmasıdır. Cinayət
Məcəlləsinin 20-ci maddəsində cinayət məsuliyyətinə şəxsin cəlb oluna bilməsinin mümkünlüyü üçün qanunvericilik ümumilikdə 16 yaşı
nəzərdə tutur, həmin maddənin 2-ci bəndində isə
müəyyən qisim cinayətlərə görə bu məsuliyyətin
14 yaşında başlanması qeydi vardır. Bu kateqoriyadan olan cinayətlər xüsusilə cəmiyyətdə teztez rastlaşdığımız və yüksək ictimai təhlükəliliyi
olan cinayətlər hesab olunur ki, bu sıraya qəsdən
adam öldürmə, qəsdən sağlamlığa ağır zərər vurma, oğurluq, soyğunçuluq, quldurluq və s. kimi
cinayətlər daxildir.