Müstəqillik əldə etdikdən sonra Azərbaycanda məhkəmə hakimiyyətinin
yenidən qurulması, hüquqi və demokratik dövlət
quruculuğu sahəsində köklü islahatların aparılması, insan hüquq və azadlıqlarının beynəlxalq
və milli müstəvidə yenidən nəzərdən keçirilməsi
labüd hal almışdı. Keçən əsrin 90-cı illərinin
əvvəllərində dövlət hakimiyyət orqanlarının
fəaliyyətini tənzimləyən normativ bazanın səmərəsizliyi dövlət-vətəndaş münasibətlərində
çətinlik yaratdığı kimi, korrupsiya risklərinə və
digər hüquq pozuntularına əlverişli şərait yaradırdı. Bir tərəfdən ölkəmizin beynəlxalq arenada özünü sübut etmə səyləri, digər tərəfdən
daxildə yeni hüquq sisteminin bərqərar olması
vəzifələri gənc respublikanın qarşısında duran
taleyüklü məsələlər idi.